Mapa-jaia « Euskal Mapa

Mapa-jaia

JOSM ikastaroko kronika

Hamabost bat lagun gerturatu ziren pasa den ostiralean Tagzaniaren bulegora. Giro polita izan genuen eta guztiei eskertu nahi dizuegu gurera etorri izana. Oso balorazio ona egiten dugu, bereziki, geroz eta interes gehiago dagoelako gure inguruan OpenStreetMap dela eta.

Ikastaroaren hasieran aurreko urteko kronika eta 2010. honetarako desioak eskatu genituen. Argi daukagu desio nagusia maparen kalitatea hobetzea dela, eta horretarako mapazale gehiago erakarri behar ditugu proiektura eta datu publikoak erabil ahal izan behar dugu. Pixkanaka komunitate sendo bat eratzen ari gara, horixe da mapa on bat izateko lehen pausua.

Hona hemen grabatu genituen hainbat irudirekin egindako bideoa:

Eskerrak eman nahi dizkiegu Josu Mendicute, Asier Sarasua eta Urtzi Azkueri errealizazio, grabaketa eta musikagatik, hurrenez hurren.

Facebook-eko EuskalMaparen taldean hainbat argazki ikus daitezke.

JOSM ikastaroa Eibarren

Datorren ostirala honetan JOSM tailerra egingo dugu Tagzaniaren bulegoan. Zergatik etorri? JOSM erabiltzen ikastea nahi baduzu, instalatzeko laguntza behar baduzu edota OpenStreetMap-en gabiltzan gainerako pertsonak ezagutzea nahi baduzu. Ekarri zure eramangarria eta JOSM instalatzen lagunduko dizugu!

Non: Tagzaniaren bulegoan, Eibarren.

Noiz: Urtarrilak 22, ostirala, arratsaldeko 17:00etatik 19:00ak arte.

Eman izena beheko formularioan:

Loading…

Mapa-jaia — No Comments
10
Dec 09

Mapa-jaia Donostian

Gure mapa-jai egitaraua ez dugu geratzerik nahi, oraindik leku asko jarri behar ditugu mapan eta erabiltzaile berriak erakarri nahi ditugu OSMra.

Hurrengo mapa-jaia Donostian egingo dugu:

Data: abenduak 19, larunbata
Ordua: goizeko 10:30
Lekua: Miramongo Bic Berrilanen bulegoa

Bilkura hau hasiberriei zuzendua dago gehienbat, OSM zer den, zergatik sustatu nahi dugun eta nola editatzen den erakutsiko dugu.

Izen-emateak eta informazio guztia hemen aurki dezakezu (hala ere, ez da beharrezkoa hor izena ematea).

Animatu zaitez OSM ezagutzera!

Mapa-jaia — No Comments
4
Dec 09

OpenStreetMap BBTGasteizen

Atzo Gari eta Dani Gasteizen izan ziren OSMren berri ematen. Aurkezpen hitzaldi bat izan zen mapa-jai bat baino gehiago. Hona hemen erabilitako aurkezpenak (OSMren inguruan lehena eta bigarrena JOSM editoreaz):

OpenStreetMap – Mapa libreen sorkuntza

OpenStreetMap – JOSM editorea

Material hau euskaraz badago ere, jardunaldia gazteleraz antolatua zegoen. Hemen material eta lotura interesgarriak:

Mapa-jaia — 2 Comments
1
Dec 09

Arrasate eta Getxo mapeatzen

Aurreko astearen bukaeran bi mapa-jai genituen agendan, ostegunean Arrasaten eta larunbatean Getxon. Biekin oso gustura egoteko arrazoiak dauzkagu, gerturatu jendeagatik zein mapan egindako hobekuntzengatik. Horregatik, hasieratik eman nahi dizkiegu eskerrak Arrasateko Gazte bulegoa eta Ukberri.net-i OSM beren herrietan ezagutzera emateko aukeragatik.

Arrasate mapeatzen

Bilkura polita antolatu zigun Arrasaten Patxi Gaztelumendik. OSM zer zen azaldu, herritik buelta bat eman eta edizio tailerra egin genuen ondoren. Herriko mapa hobetzeko udalak emandako planoak izan genituen, aparteko laguntza dudarik gabe (mapa liberatze bidean jarri dute, laster emango dituzte argibide gehiago).

Ondorengo irudietan Arrasateko mapa nola zegoen:

eta hemen berriz mapalarien lanaren ostean nola dagoen:

Hemen beste bi irudi konparaketak egiten (lehenago eta ondoren). Izugarrizko lana egin dute, zorionak guztioi!

UKblogak jardunaldia, Getxo

Larunbatekoa ere jardunaldi polita. Mapez gain Interneten irratia eta zuzeneko bideoa nola egin daitekeen azaldu ziguten Patxik berak eta Gorka Julio – Galder Gonzalez bikoteak. Hona hemen mapan egindako hobekuntzaren adierazlea (irudia garaiera gehiegitik atera genuen, lastima):

eta ondoren:

Ikusi Getxoko mapa nola geratu den.

Erabiltzaile hauei esker, Arrasate eta Getxo ez dira gaizki mapeatuta bezala agertuko Euskal Herriko maparen egoeraren bertsio berria egiten dugunean.

Mapa-jaia — 1 Comment
24
Nov 09

Arrasate eta Getxo mapeatzera

Hamaika mapa-jai antolatu ditugu jada hainbat herritako mapa hobetuz, eta asmo horrekin jarraituko dugu Euskal Herrian OpenStreetMap ezagutzera eman eta bultzatuz.

Hurrengo egunetan beste bi aukera izango dituzu OSM zer den eta nola lagun dezakezun jakiteko:

Ostegun honetan Arrasaten: Arrasateko Gazte bulegoarekin batera antolatua (arratsaldeko 6etan Gazte bulegoan)
Larunbatean Getxon: Ukblogak topaketaren barnean (UKBerri.net-ek antolatua, goizeko 10etan Aldai Patronatuan)

Mapa-jaia — 3 Comments
23
Nov 09

Ardiki mapping party

Ostiralean Alegian elkartu ginen OSM inguruan aritzeko Txarli eta Iñigoren eskutik.

Urtero antolatzen dituzte Txintxarrisferaren barruan ekitaldi ezberdinak eta aurten Ardiki Mapping Party-a izan dugu. Ez da gutxi Alegia bezelako herrialdean hamar bat lagun elkartzea, aupa Alegi!

Openstreetmap zer den, zertarako eta nola egin, hauek izan ziren pausoak. Inon ez bezala aurkezpena, txalaparta musikarekin egin genuen. Gaizki ez.

Aurkezpenean Walking-papers-etaz aritu ginen eta baita paperak banatu ere. Bizpahiru GPS tresna ere bildu genituen, eta jarraian herria mapeatzera joan ginan. Bertan elkartutakoak ezagutzeko grina zeukaten, eta galdera barra-barra eta intentzioz jantziak izan ziren.

Datuak bildu eta guztiok wifia zuen tabernara joan ginen eta bertan garagardo artean Alegia mapeatzen jardun genuen. Interes handiko mutilak iruditu zitzaizkidan eta ustez indarrean arituko direnak OSM jorratzen.

“Party”-a ondo bukatzeko Ardiki afaria izan zen Ugarten, eta hona hemen bertako argazkiak, hitzik gabe: Hori duk sakea mutilak!

Hemen aurretik…:

eta ondoren nola dioan Alegiako herria eta inguruneak:

Azken detaile gisa, Iñigok egin zigun iradokizuna martxan jarriko dugu ( “Nola demontre” ), bertan OSM nola editatu eta ze trikimailu dauden argituko ditugu.

Bejon deizuela Alegiko gazteok eta jarraitu horrela!

Mapa-jaia — No Comments
2
Nov 09

Zornotzako mapa hobetzen

OpenStreetMap-en Zornotzako mapa hobetzen jardun genuen hainbat mapazalek aurreko ostiralean. Gerturatutakoek OSM-ren nondik norakoak ondo ezagutzen zuten, beraz datu bilketara jo genuen zuzenean, Zornotza hainbat zatitan banatu ostean.

Datuak jaso eta Zelaieta zentrora itzuli ginen. Bertan JOSM editorea nola erabili zalantza batzuk argitu ostean, mapa osatzeari ekin genion.

Hona hemen nola zegoen Zornotza:

eta nola dagoen orain:

Maparen kalitatea asko hobetu genuen, nahiz eta egiteko dezente geratzen den arren. Gogoratu boligrafoa eta papera nahikoa direla mapa osatzeko!

Mapa-jaia — 1 Comment
26
Oct 09

Irun mapeatzen

Aurreko larunbatean Irungo mapa-jaia ospatu genuen. Ez ginen pertsona gehiegi ere gerturatu, baina Euskal Herrian dabiltzan bi mapazale aktiboenetakoak etorri ziren, Ketari eta Beñat Irasuegi (Irati alabarekin, ziurrenik OSMn dagoen mapera gazteena).

Hona hemen lehen nola zegoen Irungo mapa:

Eta gure lanaren ostean nola geratu den:

Begiratu OpenStreetMap-en bertan nola geratu den Irun mapeatuta.

OSMri buruz gehiago ikasi nahi? Zatoz Zornotzako mapa-jaira.

Mapa-jaia — No Comments
22
Oct 09

Beasaingo mapa sortzen

Atzo goizean Beasaingo mapa sortzen ibili ginen Txindoki-Alkartasuna institutuko ikasleekin batera. Atzo arte, oso itxura tristea zeukan Beasainek OpenStreetMap-en.

Ikasle taldeari OpenStreetMap-eko azalpenak eman genizkien eta herriko datuak jasotzera joan ginen.

Datu mordoa jaso genituen, bai kaleak zein interes guneak. Pixkat xaxatzeko asmotan Ordizian egindako mapa ederra erakutsi genien. Gero ezin izan genituen datu guztiak igo eta tagzaniarrok errematatu dugu lana. Itxura polita dauka Beasaingo mapak orain:

Eskerrak eman nahi dizkiogu Joseba irakasleari, baita Jokin Lacalleri (Jolaus) ere, berak jarri gintuelako harekin kontaktuan.

Euskal MapaOpenStreetMap-en inguruko bloga